ໃນຕອນເຊົ້າ ຂອງວັນທີ 14 ທັນວາ 2021 ນີ້ ທາງກົມພັດທະນາການທ່ອງທ່ຽວ, ກະຊວງ ຖວທ ໄດ້ຈັດຝຶກອົບຮົມ ການຂຽນພັດທະນາການທ່ອງທ່ຽວ ໃຫ້ແກ່ພະນັກງານ-ວິຊາການ ໃນຂົງເຂດທ່ອງທ່ຽວ, ພະແນກ ຖວທ ແຂວງຫຼວງພະບາງ, ຫ້ອງການ ຖວທ ນະຄອນ ແລະບັນດາເມືອງທົ່ວແຂວງ ໂດຍການເປັນປະທານຂອງທ່ານ ພອນມະລີ ອິນທະພົມ ຫົວໜ້າກົມພັດທະນາການທ່ອງທ່ຽວ, ຊີ້ນຳໂດຍທ່ານ  ປອ ນາງ ສຸດາພອນ ຄົມທະວົງ ຫົວໜ້າພະແນກ ຖວທຂ, ມີຫົວໜ້າຂະແໜງພັດທະນາການທ່ອງທ່ຽວ ແລະວິຊາການ ຂົງເຂດທ່ອງທ່ຽວ, ບັນດາຫົວໜ້າ, ຮອງ ແລະວິຊາການ ຈາກ ຫ້ອງການ ຖວທ 1 ນະຄອນ ແລະ 11 ເມືອງທົ່ວແຂວງຫຼວງພະບາງ ເຂົ້າຮ່ວມ.

ການຈັດຝຶກອົບຮົມຄັ້ງນີ້ ຜູ້ເຂົ້າຮ່ວມໄດ້ຮັບຟັງ ແລະແລກປ່ຽນຄວາມຄິດເຫັນ ຕໍ່ກັບເນື້ອໃນ ໂດຍສະເພາະແມ່ນ: ຄວາມຮູ້ພື້ນຖານສຳລັບການວາງແຜນພັດທະນາການທ່ອງທ່ຽວ, ການພັດທະນາຜະລິດຕະພັນການທ່ອງທ່ຽວ, ການວາງແຜນ, ການກຳນົດໄລຍະເວລາຂອງການວາງແຜນ, ວິທີ ແລະຂັ້ນຕອນຕ່າງໆ ຂອງການຂຽນແຜນພັດທະນາ ເປັນຕົ້ນແມ່ນ: ການສຳຫຼວດ ແລະສັງລວມຂໍ້ມູນ, ການສຶກສາ ແລະວິເຄາະຂໍ້ມູນ, ການວິເຄາະ ຈຸດດີ, ຈຸດອ່ອນ, ກາລະໂອກາດ ແລະສິ່ງທ້າທາຍ, ການກຳນົດວິໄສທັດ, ຈຸດປະສົງ, ຍຸດທະສາດ ແລະນະໂຍບາຍ, ການກຳນົດແຜນງານ ແລະໂຄງການ. ທັງໝົດນີ້ກໍ່ເພື່ອເປັນການພັດທະນາ ແລະຍົກລະດັບຄວາມຮູ້ຄວາມສາມາດຂັ້ນພື້ນຖານໃຫ້ແກ່ບຸກຄະລາກອນໃນຂະແໜງການທ່ອງທ່ຽວ ກ່ຽວກັບການວາງແຜນ ແລະຂຽນແຜນພັດທະນາການທ່ອງທ່ຽວໃນຕໍ່ໜ້າ.